حسـين نجم

أقرو الكابشن ضروري …. رحت اشتري دجاجة وانا واكف جان يجي رجال جبير شايب بين عليه فقير
ومحتار سأل ابو المطعم بيش دجاجة؟
كاله ٦ الاف دينار
الحجي طلع من المطعم وكعد يحسب بفلوسه
وشويه ورجع لابو المطعم كله زين ما عندك دجاجه صغيره او تالفه وتنقصلي من سعرها ابو المطعم طلع تليفونه وكام يحجي بالتليفون وفرحان ويضحك الحجي خطيه من شاف نفسه ابو المطعم مامهتمله استحى وراح وكف على صفحه ينتظر ابو المطعم يكمل تليفونه وانا مصدوم ليش هيج يتعامل ويه الفقير وضنيت السوء بيه وبيني وبين نفسي كالت أنه ادفع للحجي فلوس دجاجه ولا هيج ينذل هاذا الفقير وانتظر ابو مطعم يخلص تليفونه كمل ابو مطعم تليفونه وهوه فرحان جان كبل يروح يجهز دجاجه مه الخبز مع مقبلات وجه صاح الحجي كله تعال حجي الضاهر انته وجهك وجه خير عليه هسه خابروني زوجتي جابت توأم وهاي الدجاجه مني الك هديه بهاي
المناسبه.......
أخذها الحجي وكام يدعيله دعاوي خير ورزق وراح ومن بعد ما أشتريت وخلصت كتله يأبه مبروك عليك يتربون بعزك جان يضحك ابو المطعم وكلي لايمعود ماكو هيج حجي انه كذبت هيج كذبه بيضه وان شاء اللّٰه اللّٰه
يحاسبني عليهه كتله شلون بشنو جذبت
كلي هاذا الرجال اعرفه وهوه صدك محتاج وفقير وحالته تعبانه وعده ٣ بنات وزوجته بناته يساعدنه بحياكه ليفه الحمام وهوه يفتر يروح يبيعهن بس ما يقبلون واحد يتصدق عليهم ولاهوه ياحذ صدقه وانا سويت هاذا الفليم كدامه حته ياخذ دجاجه هديه موصدقه وانه حبيت انطيه الدجاجه مجانيه
بس بدون ما احسسه انه هوه انسان فقير وانا أتصدق عليه
#الصراحه موقف صدمني ودمعت عيوني وحاولت اتمالك نفسي وكتله لعد ابريني الذمه لان ضنيت بيك سوء شفتك تجاهلت الحجي........
اجبروا خواطر الفقراء فلها منزله عظيمه عندالله سبحان وتعالى وما أقبح الغني عندما يتسلى بدموع الفقراء سيكون عذابه عند اللّٰه عسير اللهم اكتب لنا في هاذا اليوم من الخير ما تقسمه لخلقك وكفنا شر مايكون
قبل أن يكون