ميشا هاشم ♏️

يمكن قد ما حاول، مستحيل أقدر عبّر عن فخري بكوني جزء من هالعمل. في أعمال بتمرق بحياتنا وبتكون أكتر من مجرد مشروع، وبتترك فينا أثر كبير. وهيدا الفيلم بالنسبة إلي واحد من هالأعمال.

كل إنسان كان جزء من هالفيلم، من فريق العمل للممثلين، لكل شخص حط وقته وتعبه بهالمشروع، ترك بصمة حلوة فيي. ومن قلبي بتمنى ما تكون هيدي آخر مرة منشتغل سوا، وإن شاء الله تجمعنا الأيام الجاية بأعمال جديدة.

هالفيلم وراه قصة، تاريخ، وإنسان كبير كتير لازم الناس تعرفه أكتر. اسم البطريرك إلياس الحويك لحاله قصة. بطريرك كبير، مش بس بموقعه وتاريخه، بالإنسان اللي كانه، بالأثر الكبير اللي تركه بلبنان وبشعبه وبكل طوايفه. ومن أكتر الأشياء اللي قرّبتني من هالفيلم إنو صورنا بالمطارح اللي مرق وعاش فيها، بين نفس الجدران والطرقات والأماكن اللي كانت شاهدة على حياته. ولهالسبب، خلال التصوير، كان عندي إحساس غريب وحلو إنو البطريرك كان موجود معنا، بكل تفصيل، وكأنو حاطط إيده معنا وعم يساعدنا نحكي قصته بالطريقة اللي بتليق فيه.

وبالنسبة إلي، هالفيلم ما كان مجرد تجربة مهنية. ترك فيي شي أكبر بكتير، وعلّمني وذكّرني بشغلة رح تضل مرافقتني بكل حياتي: شو ما صار معنا، ووين ما بتاخدنا الطريق، الله دايمًا بيدبّر.

هالفيلم رح يضل من أجمل المحطات بمسيرتي، وقطعة حلوة كتير من ذاكرتي وقلبي.

صار فيكن تلتقوا بهالقصة عن قرب، وصار موجود بصالات السينما. لازم كل شخص يروح يحضر الفيلم ويعيش هالقصة، ويتعرّف أكتر على رجل من أهم الشخصيات بتاريخ لبنان. ما تضيّعوا الفرصة.. 🤍

#movies #cinema #castingdirectors