Ziqua Lab

اب القوس ، معلم اثري عريق واقف في مدخل المدينة العتيقة بزغوان ، يحميها و يحرس فيها ، هو واحد مالبيبان القدم الرئيسيين لمدينة زغوان و هو الوحيد الي قعد لليوم موجود و صامد . تبنى في الفترة الرومانية تخليد لذكرى انتصار الرومان في وحدة من المعارك و مبعد ستعملوه الاندلسيين كمدخل رئيسي للمدينة ، باب يخبي برشا اسرار و برشا حكايات وراه . المنظر العام متاعو تبدل برشا مرات من اول مرة تبنى لكنو قعد شاهد على العصور و المراحل التاريخية الكل الي عرفتهم زغوان من وقت الرومان لليوم . باب القوس معلم سياحي مينجمش يجي واحد لزغوان و ميزوروش و ميتصورش فيه خاصة و انو بلاصتو حلوة برشا و زيد يضم حديقة معلقة فيها برشا انواع متع ازهار و نباتات . الصرح هذا عندو علاقة كبيرة بالحركية الاقتصادية في البلاد خاتر هو المدخل الرئيسي الى يهز للمدينة قبل و حتى توا و زيد الساحة الصغيرة الى مبني فيها تمثل بلاصة يتلاقاو فيها الناس كبار و صغار و تصير فيها حفلات و تظاهرات دينية خاصة في شهر رمضان الكريم . باب القوس عرف مؤخرا عمليات ترميم بعد ماطاح جزء منو و المجتمع المدني بزغوان مسكتش عليه و قامت عدة جلسات و اجتماعات في خصوص الحل الي نجمو نلقاوه بس نحميو هالكنز العزيز علينا و على بلادنا و نحميو زادا المواطنين الي ينحمو يكونو في خطر كي يتعداو و الا ياقفو بحذاه . السلط المعنية بالامر كيما معهد التراث و البلدية و الولاية مدخروش جهد في اعادة ترميم الجزء الخايخ و الطايح من الباب و هكا نكونو ساهمما في الحفاظ على رمز من رموز مدينة زغوان و تونس ككل و عاودنا بعثنا روح جديدة في مدينتنا المزيانة.
photos:Abdelhedhi boudeli / zika tv
post writing:Abdelhedi boudeli
design: Adam chaabane