波 𝔸𝕔𝕒𝕕𝕖𝕞𝕪 𝕠𝕗 𝔻𝕣𝕦𝕞𝕞𝕚𝕟𝕘 𝔸𝕣𝕥𝕤 | 波•鼓樂學院

波 • 鼓樂學院之由來 [長文慎入]

波 • 鼓樂學院個波字顧名思義嚟自波子，但係大家又知唔知波子呢個咁得意嘅花名係點嚟嘅呢？不如等小編同大家講解吓啦。

70-80年代初起，香港有一位職業鼓手全名為張建波，嗰個年代大家稱呼佢做波仔，到後來嘅波哥、波爺，甚至有「香港鼓皇」嘅美譽。

張建波先生作為由國語黃梅調年代的靜婷、凌波至粵語流行曲的徐小鳳、許冠傑、林子祥至陳百強、張國榮、梅艷芳至王菲、林憶蓮、關淑怡、四大天王、鄭秀文，甚至千禧年後的Twins都可以勝任的專業音樂人，佢錄過嘅歌曲、做過嘅演唱會大家如果有聽開廣東流行曲嘅習慣就一定有聽過佢嘅鼓聲。

據波子憶述，當年香港流行音樂正值輝煌時期，唔係成日有機會可以見到父親，亦可能咁樣，所以如果情況許可佢父親會帶埋波子返工，所以波子幾歲就已經喺錄音室、演唱會排練室甚至紅館度打滾，正確嚟講係行行企企(⁎⁍̴̛ᴗ⁍̴̛⁎)

亦因為自小就喺呢個音樂圈子嘅氛圍下，波子好細個就已經希望可以跟隨父親嘅步伐而成為一位岀色嘅職業鼓手。

有趣嘅地方嚟喇，當大家見波爺成日帶住個仔岀入工作地方一心以為佢想為個仔鋪路，要傳佢衣鉢？其實佢係唔想甚至反對波子入行做鼓手㗎，所以波子求咗父親好多年，直到佢12歲父親先肯正式教佢打鼓。
到佢哋終於上堂，父親嘅第一句就係:「如果第時你要入行，唔該你俾心機練好啲，唔好影衰我個名！」

Fast forward 到後來波子父親撞show，所以波子就以替工身份加入了許冠傑樂隊，而當時許冠傑樂隊領班楊雲標先生(細AL)，就用咗（波之兒子) 呢個意思幫波子改咗呢個花名 ，自此波子就有咗呢個佢自己都好鐘意嘅花名。

張建波先生一生只教了兩個徒弟，而兩個徒弟都算托賴不負所望，可以喺香港音樂圈至今立足咗十幾年，到2020年疫情肆虐，波子決定整合自己多年於行內的經驗及知識開班教授學生，波子亦於此時段內就父親的傳統訓練及現今新興流行音樂糅合雙方優點撰寫了許多教材。

所以 波 • 鼓樂學院，波子用了父子兩代人的名義而創立，為本地少數專攻流行鼓樂而設的學院，立志將我們的技術傾囊相授予各位喜愛打鼓嘅朋友。