ಠ⁠‿⁠ಠ

البلك المحترك...

شسمة هاي البارحة احترك عندي بلك الصوبة صار لونه اسود وطلع منه دخان ريحته تشبه ريحة الفشل.

بقيت واكف كباله.

فكرت هو البلك ليش يحترك ؟

لو السحب عليه عالي أكثر من طاقته لو هو أصلاً نوعيته تعبانة ومغشوش مثل هواية ناس يبينون اصليين ومن اول حمية يذوبون ويشوطون ويسوون عندك شورت بالمشاعر.

ذكرني هذا البلك المحروك بصديقي مهند مهند جان من هذا
النوع اللي يحب ينطي اكثر من طاقته تسأله شلونك؟
يكلك فدوه الك

تطلب منه ربع ينطيك الف ويستحي منك هم

بقى هنودي يحمل نفسه لود عالي لحد ما يوم شاط وانفجر بينا وكال بعد ما أتحمل أحد وانعزل

الناس عبالهم صار نذل بس الحقيقة هو خطية وايراته ما
تحملت كل هذا الدفع العالي من المجاملة.

وترا اني هم مرات احس مشاعري مثل هذا البلك تجي ايام اريد اصير طيب ويه الكل واسمع الكل واتحمل خبالات الكل...

بس فجأة احس بريحة شعواط داخلي

أحس روحي اريد اطفي السيركت واطفي الضوة على كل العالم واكعد بالظلمة.

هي ترة المشكلة ب الفيوز اللي بداخلنا.

ليش الله مخلالنا فيوز يبين للناس ان احنه تعبنا؟ ليش لازم نحترك يله يدرون بينا شبعنا ضيم؟

وهسة هذا البلك الاسود اذا اريد أصلحه لازم اكص الواير المحروك يعني لازم اخسر قطعة من الواير حتى اكدر ارجع اشغله
وهذا هو حالنا من نريد نتجاوز صدمة أو علاقة فاشلة لازم نكص قطعة من كلبنا ونذبها بالزبالة ونربط الباقي ونتوكل على الله.

الخسارة جزء من التصليح ومحد يطلع من الدنيا كامل الوايرات بالمناسبة الجو بدا يبرد واني بدون صوبة لأن البلك محترك والدرنفيس ضاع بلمحة بصر

مدري وين يروح الدرنفيس من نحتاجه

يختفي مثل الوعود اللي ناخذها من الناس وقت المصلحة تتبخر
چن فص ملح وذاب

هسة المهم اللهم لا تجعلنا مثل البلكات المغشوشة نحترك ونحرك اللي ويانا.

وهسه راح اروح ادور على الدرنفيس وادري راح الكاه بمكان ماله علاقة بالتصليح يعني يمكن الكاه بالثلاجة ورا سلة الطماطة لان العقل من يشوط يسوي اشياء اغرب من المنتخب العراقي من يلعب ويا الاردن