Christian Sarnouk

في ليالي ما بتمرّ… وليلة ٢٢ كانت من اللي ما بينتسوا.
كنا سوا بـ مار شربل، بنفس السيارة، بنفس الطريق… وما كان في شي بيقول إنو هيدي اللحظة رح تغيّر كل حياتنا.
يا ديمي، بعدني لهلّق مش مستوعب إنك رحت…
كنا فريق واحد، قلب واحد، ضحكة وحدة… واليوم الفراغ اللي تركتو أكبر من أي كلمة.
مش بس فقدنا شخص معنا… فقدنا روح الفريق، فقدنا أخ، فقدنا قطعة من كل واحد فينا.
وجودك كان بيعطي معنى لكل لحظة، لكل ضحكة بيناتنا.
ليلة ٢٢ ما أخدتك بس من الحياة… أخدت معك شي من قلب كل واحد فينا.
من وقتها، ما عاد في شي متل قبل.
بدي قلك شغلة قدام الكل…
إنت يا ديمي مش بس رفيق، إنت أخ.
وأهلك صاروا أهلنا، وعيّلتك عيلتنا… وجعهم وجعنا، ودمعتهم من دمعنا، ووعد منا نضل حدّن متل ما كنت حدّنا.
رح نكفّي الطريق كرمالك يا ديمي…
رح نلعب، نضحك، ونحارب بكل قوتنا، وإسمك معنا بكل لحظة.
إنت الغايب الحاضر، وإسمك محفور بالقلب للأبد.
الله يرحمك يا ديمي…
ما رح نقول وداع… لأنك باقي فينا، بكل تمريرة، بكل هدف، وبكل نفس.