Shereen S Mohammad

سنة بألمانيا… سنة كانت مليانة تجارب، تعلم، اكتشافات، وإنجازات صغيرة وكبيرة، بس أثرها بحياتي كان كتير كبير. 🇩🇪🤍
خلال هالسنة اكتشفت حالي أكتر، وعرفت قديش أنا قادرة اعتمد على نفسي، واجه الصعوبات، واتعلم من كل تجربة بمر فيها. اكتشفت إنو الإنسان أوقات ما بيعرف قديش عنده قوة إلا لما ينحط بمواقف بتخليه يطلع كل القوة اللي جواته....
ومن أكتر الأشياء اللي حبيتها بألمانيا هي الدراسة. رغم صعوبة المناهج، وكثافة المعلومات، والتحديات اللي بترافق الدراسة هون، حسيت إني عم عيش من أجمل المراحل الدراسية بحياتي، خصوصي لما قارن تجربتي هون بدراستي بسوريا وتركيا. في شي مميز بالتعليم بألمانيا، شي بيخليك تحس بقيمة العلم، وبصدق الجهد المبذول بالتدريس، وبإنو المعرفة مو بس معلومات لازم تحفظها وتنجح فيها، وإنما شي لازم تفهمه، تعيشه، وتستفيد منه عنجد.....
وهالسنة كمان علمتني إنو ألمانيا فيها أبواب كتير للنجاح، وفرص ممكن تغيّر حياة الإنسان، بس مو كل باب بينفتح لحاله، ومو كل فرصة بتوصل لعندك. بدك إرادة قوية، وصبر، وإصرار، والأهم إنك تعرف شو بدك، وتعرف أي باب تدق، وإيمتى لازم تكمل حتى لو الطريق كان صعب.
يمكن أكتر شي بفتخر فيه بهالسنة مو بس الأشياء اللي حققتها، وإنما الشخص اللي صرت عليه خلالها. صرت أعرف قيمة اعتمادي على نفسي، وقيمة كل خطوة بخطيها لحالي، وكل مرة بتجاوز فيها صعوبة وبكتشف إنّي قادرة كمّل....
كانت سنة غيرت فيني كتير أشياء، وعلمتني إنو النجاح مو بس بالوصول، النجاح كمان بكل شي بتتعلمه بالطريق، وبكل نسخة أقوى وأنضج من حالك بتوصل إلها مع الوقت....
سنة بألمانيا، وسنة من أجمل مراحل حياتي… ولسّا الحلو لقدّام بإذن الله...🤍