ЖЕЗКАЗГАН | СОБЫТИЯ | НОВОСТИ

Көлік, тіркеу, баспана: Қазақстанда қандай отбасылар жәрдемақыдан қағылуы мүмкін?

2027 жылдан бастап Қазақстанда отбасылардың материалдық жағдайы арнайы балдық жүйемен бағаланады. Бұл ретте тек жалақы ғана емес, баспанасы, көлігі, несиелері, бала саны, денсаулық жағдайы, тіпті қай жерде тіркеуде тұрғаны да ескеріледі.

Жаңа жүйе қалай жұмыс істейді? Қандай жағдайда ұпай қосылып, қандай жағдайда шегеріледі? Түсіндірейік.

Отбасылар тұрмыс деңгейіне қарай бес санатқа бөлінеді:

* А — тұрмысы жақсы: 1800 балл және одан жоғары;
* B — тұрмысы қанағаттанарлық: 730–1799 балл;
* C — тұрмысы қанағаттанарлықсыз: −30-дан 729 балға дейін;
* D — дағдарыс жағдайындағы: −460-тан −29 балға дейін;
* E — шұғыл көмекке мұқтаж: −459 балл және одан төмен.

Отбасы неғұрлым көп балл жинаса, оның тұрмыс деңгейі соғұрлым жоғары деп есептеледі.

Балл қалай есептеледі?

Отбасының табысы

Алдымен отбасының бір айлық жалпы табысы мүшелерінің санына бөлінеді. Содан кейін әр адамға шаққандағы табыс кедейлік шегімен және ең төменгі күнкөріс деңгейімен салыстырылады.

Егер табыс мүлде болмаса — 0 балл. Бір адамға шаққандағы табыс кедейлік шегінен төмен болса — 40 балл, кедейлік шегінен жоғары, бірақ ең төменгі күнкөріс деңгейіне жетпесе — 100 балл беріледі.

Табыс мөлшері ең төменгі күнкөріс деңгейінің бір-екі есесіне тең болса — 170 балл, екі-үш есесі — 280, үш-төрт есесі — 400, ал төрт есесі немесе одан жоғары болса — 620 балл есептеледі.

Несие мен қарыз

Отбасында өтелмеген несие болса, жалпы көрсеткіштен 50 балл шегеріледі.

Егер отбасының кәмелетке толған бір мүшесінің 1000 теңгеден асатын қарызы 90 күннен артық уақыт бойы өтелмесе, 250 балл шегеріледі. Мұндай берешек кәмелетке толған барлық отбасы мүшесінде болса, 500 балл алынады.

Көлік пен техника

Отбасында көлік болмаса — 50 балл шегеріледі. Бір автокөлік үшін балл қосылмайды да, алынбайды да. Екі көлік болса — 50, үш немесе одан көп болса — 100 балл қосылады.

Коммерциялық көліктің болуы қосымша 80 балл береді. Ал ауыл шаруашылығы техникасы үшін 100-ден 200 балға дейін есептелуі мүмкін.