TalkFood 港飲港食

#TF 【#吃好吃】$70+杯 值得食？中環排隊希臘乳酪雪糕 必試杜拜朱古力醬+莓乾

最近每次行過中環威靈頓街，一定見到超長排隊人龍！
來自西班牙馬德里嘅人氣希臘乳酪雪糕品牌 MYKA，早前開咗亞洲首間旗艦店啦！
小編以為開張了一段日子，人潮應該稍稍退卻，特意選在平日11點開門準時到達，點知，已經有人排隊等食，真誇張！

MYKA 於2023年在馬德里起家，短短時間已經擴展至全球17個國家，連紐約、巴黎同倫敦都有分店！主打原材料用正宗希臘乳酪，加山羊奶克菲爾乳酸菌，每日香港新鮮製造，非常新鮮！

店內超貼心設有小杯免費試食乳酪雪糕，大家可以試咗口味先決定下單！
乳酪雪糕分細、中、大3種尺寸，分別是：細 - 1 Toppings $58.9 / 中 - 2 Toppings $71.9 / 大 - 3 Toppings $84.9。
店內提供30款以上地中海風味配料，由各式堅果、手工果醬到經典果仁蜜餅都有得揀！

乳酪雪糕口味不定期推出，當日是招牌原味及肉桂味，小編選混合口味乳酪，加配超熱門杜拜朱古力醬 + 莓乾Toppings。

杜拜朱古力醬跟乳酪雪糕，一啖入口，嘩！大推朱古力醬，非常濃稠，夾雜脆脆，非常crunchy！莓乾酸甜清新，食落口感層次超豐富，真係一啖接一啖，瞬間KO一整杯。

招牌原味乳酪雪糕，質感輕盈，相當滑順綿密，帶淡淡奶香，味道比一般乳酪雪糕酸些少。

今期肉桂味乳酪雪糕，肉桂香氣其實幾突出，如果撈埋太重口味Topping，肉桂味有機會被掩蓋。

私心建議肉桂味配淡味 Toppings，例如堅果或簡單蜂蜜，甚或直接食用都唔錯。

坦白講，2 Toppings 70幾蚊一杯確實有少少貴，但食落無論質感定配料都好有水準，整體絕對係值得試。

最後小編溫馨提示大家，現場的而且確要排一段時間，事關每位客人入到去除咗可以先試食之外，面對成 30 款 Toppings 仲好容易會眼花撩亂、十五十六揀唔定！建議大家去到之前可以睇定 Menu，諗定心儀嘅配料組合，咁就可以快手點單啦！

MYKA Greek Frozen Yogurt @myka_greek.hk
地址：中環威靈頓街43號新利大廈地下D號鋪
營業時間：星期一至日 11am-10pm

#雪糕 #乳酪 #TalkFood #TalkFood中環