Instagram story viewer> @sarman_farm> Posts

Sarman Farm

@sarman_farm

27

followers

64

following

Sarman Farm 🌿 Ghar lautne ki ek kahani. 🌿
Stories • Nature • Community
Building Sarman Farm, one chapter at a time.

POSTS STORIES REELS TAGGED

Jab yahan Babba (Dada) aur Bai (Dadi) rehte the, tab yahan ki baat hi alag thi. Poori jagah mein ped-paudhe the, unhe ped lagane ka bahut shauk tha. Mujhe yaad hai yahan anar aur bihi (amrood) ke ped the. Ek baar unhone angoor lagane ki koshish ki thi, lekin woh lag nahi paaya tha.
Aur haan, humare yahan karonda hota hai jo ek jungli phal hai. Unhe uski chatni bahut pasand thi, aur uska achaar bhi badhiya banta tha. Iske saath-saath, aajkal jo aap dukaano se khareedkar mehendi laate hain na, uska ek bada jhaad (ped) laga hua tha. Badhiya mehendi todo, silbatte par peeso aur laga lo!
Yeh likhte-likhte main ekdam se apne khaliyan mein pahunch gaya hoon, aur ab mujhe sab kuch dikhne laga hai. Wahan ek kuan bhi tha, kuan se paani bharne mein bahut maza aata tha. Phir haudi mein paani daal kar wahan khule mein snan (nahana)... yeh sab bahut sukhad tha.
Babba ek-do jaanwar hamesha paalte the kabhi bakri toh kabhi murgi. Poore jeevan bhar woh swayam par nirbhar rahe hain. Unke jaane ke baad yeh jagah ekdam se sooni, veerani aur khandhar si ho gayi hai.
Lekin ab samay aa gaya hai isey dobaara jeevit karne ka! taken in Chhatarpur, Mp by @sarman_farm

39

4

3 months ago

“Aaj jab maine ye darwaza khola...to mujhe yaad aaya ki gaon mein hamara ek ghar hua karta tha. Jab bhi hum gaon jaate, sabse pehle wahan jaate the. Wahan dada-chacha logon se milkar khalihaan aaya karte the—babba aur baayi se milne. Phir wahan kuch der ruk kar wapas Chhatarpur nikal jaya karte the.

Mujhe khalihaan mein zyada accha lagta tha. Wahan sab khula-khula tha, ped the, badi jagah thi... aur ek kuan tha. Kuan se paani nikal kar haudi mein daal kar nahane mein bada maza aata tha! Papa ko chatni banane ka bada shauk tha. Wo phat se wahin khalihaan mein lage karaunde ko todkar, fauran silbatte par pees kar chatni bana diya karte the. Aur phir chulhe ki roti ke saath wo chatni... aaha! maza hi aa jaya karta tha!

Phir chaarpaai par aaram se dhas kar aasmaan dekhna... kitna sukoon milta tha! Phir shaam hone se pehle nikalna bhi hota tha. Hamare paas Hero Honda CD100SS thi, hum chaaron isi motorcycle par aaya-jaaya karte the. Jaate waqt meri baayi (dadi/nani) hamesha apni saree ke pallu mein bandha 1 rupaya mujhe detin aur kehtin—‘biscuit kha lena’... aur fir hum sheher nikal jaate.” taken in Chhatarpur, Mp by @sarman_farm

41

1

3 months ago

Sarman Farm | Chapter 1

Mera naam Kuldeep Kushwaha hai aur main Mumbai mein rehta hoon.

Aur aap jo ye zameen ka tukda dekh rahe hain... ye sirf zameen nahi hai.

Ye ek ehsaas hai.
Ek rishta hai.
Ek aisa sambandh hai jo humein apne purvajon se jodta hai.

Ye mera paitrik gaon Jhijhan (Chhatarpur, Madhya Pradesh) hai.
Is zameen ko mere swargiya Babba, Sarman Kushwaha, ne apni poori zindagi mehnat se sambhal kar rakha.
Main pichhle 16 saalon se ghar se bahar hoon.
Padhai aur kaam ke safar ne mujhe Indore, Bhopal, Delhi, Mandi aur aakhir mein Mumbai tak pahucha diya.
Mumbai ne mujhe bahut kuch diya—kaam diya, naye log diye aur ek pehchaan di.

Lekin ek baat kabhi nahi badli...
Dil aaj bhi gaon mein hi basa hai.
Har baar jab ghar jaata hoon, to ek hi sawal dimaag mein aata hai...
Kya kabhi aisa din aayega jab main apne gaon ke paas rehkar bhi apna kaam kar paunga?

Shayad isi sawal ne dheere-dheere ek sapne ka roop le liya.
Aur dekhte hi dekhte 16 saal nikal gaye.

Aaj pehli baar lag raha hai ki us sapne ko shuru karne ka waqt aa gaya hai.
Jis zameen ko Babba ne itne saalon tak apni mehnat aur lagan se sambhal kar rakha, ab us zimmedari ko aage badhane ki baari meri hai.

Isi zameen par main Sarman Farm ki shuruaat kar raha hoon.

Ye sirf ek farm banane ki kahani nahi hai.
Ye apni jadon se dobara judne ki kahani hai.
Ye ghar lautne ki kahani hai.

Aur main chahta hoon ki aap sirf iska nateeja na dekhein, balki is poore safar ka hissa banein.

Baaki kahani... agle chapter mein. 🌿 taken in Chhatarpur, Mp by @sarman_farm

32

0

3 months ago