call for env conservation org

Wanawake 70 wanaojishughulisha na uokotaji taka Dodoma Mjini wanatarajiwa kupatiwa mafunzo ya ujasiriamali wa kijani yatakayowawezesha kuongeza thamani ya taka wanazokusanya, kukuza kipato na kujipatia fursa endelevu za kiuchumi.

Mkurugenzi Mtendaji wa Shirika lisilo la Kiserikali linalojihusisha na masuala ya Mazingira- Call for Environmental Conservation (CFEC), Upendo Mwakyusa, ameyasema hayo Jijini Dodoma wakati akizungumza na waandishi wa habari ambapo ameeleza kuwa mafunzo hayo yatajikita katika kuwawezesha wanawake hao kutumia taka kama rasilimali inayoweza kuzalisha bidhaa zenye thamani zaidi.

Mwakyusa amesema kuwa mbali na ujasiriamali wa kijani na uongezaji thamani wa taka, wanawake hao pia watapatiwa ujuzi wa kutafuta masoko na kuboresha mbinu za kuuza taka wanazokusanya ili kuongeza tija katika shughuli zao ambapo kupitia mradi huo, shirika hilo linalenga kuwajengea wanawake uwezo wa kujitegemea kiuchumi kwa kutumia fursa zinazotokana na ukusanyaji na urejelezaji wa taka.

Mbali na hayo pia wanawake hao watapatiwa mafunzo ya afya na usalama mahali pa kazi pamoja na vifaa kinga, vikiwemo buti, glovu, barakoa, kofia za kujikinga na jua na jaketi zenye viakisi mwanga, kwa lengo la kupunguza hatari wanazokabiliana nazo wanapokusanya taka.

Aidha utekelezaji wa programu hiyo utafanyika kwa kushirikiana na mitandao ya wakusanyaji taka pamoja na wadau wengine wa eneo husika ili kuhakikisha wanawake wanaostahili wanapata fursa ya kushiriki na kunufaika na mafunzo hayo.